Sonte pritet koalicioni qeverisës PDK-AKR dhe pakicat

PDK-ja e Hashim Thaçit edhe zyrtarisht i ka dërguar sot ftesë AKR-së së Behgjet Pacollit për të formuar qeverinë e ardhshme të Kosovës. Sipas një kumtese për media të PDK-së, kjo ftesë nuk do t’i dërgohet asnjë partie tjetër shqiptare, ndërsa kjo ftesë vlen për partitë e pakicave që kanë siguruar mandate në Kuvendin e ardhshëm të Kosovës.

Mësohet se sonte do të formalizohet marrëveshja për bashkëkoalicion midis PDK-së dhe AKR-së. Albinfo mëson se takimi formal do të realizohet në restorantin “Puro” në dalje të Prishtinës, ku dy net më parë u takuan liderët e partive – Hashim Thaçi e Behgjet Pacolli.

Koalicioni i ardhshëm do të ketë mbështetjen e 65 deputetëve: PDK ka 34 deputetë, AKR ka tetë, pakicat 22 deputetë, si dhe një deputet nga Lista “Dr. Ibrahim Rugova”, që është Ukë Rugova.