Mjerim në burgjet e Kosovës

Në burgun e Dubravës ka ujë të ngrohtë vetëm dy herë në javë, prandaj të dënuarit janë të detyruar të improvizojnë metoda të rrezikshme për ngrohjen e ujit. Higjiena në burg konsiderohet e mjerueshme

Higjiena nëpër qendrat korrektuese të Kosovës nuk është në nivelin e duhur, madje në disa pavijone të burgut të Dubravës, është tmerruese. Kështu e përshkruan gjendjen higjienike Këshilli për Mbrojtjen e të Drejtave dhe Lirive të Njeriut në Kosovë (KMDLNJ), pas një vizite që iu ka bërë banjove nëpër qendrat e korrektimit.

Banjat në Qendrën Korrektuese në Dubravë janë të vendosura nëpër dhoma bashkë me tualete dhe gjendja e tyre është jashtë çdo standardi. Kurse, disa pavijone i kanë banjat dhe tualetet të përbashkëta për secilin krah por pastërtia e tyre nuk është në nivel të duhur.

Në këtë qendër, sipas KMDLNJ-së, nuk ka ujë të ngrohtë rregullisht (dy herë në javë) dhe si pasojë e kësaj të dënuarit janë të detyruar të improvizojnë metoda të rrezikshme për ngrohjen e ujit.

“Higjiena e dhomave dhe rrobave është e pamundur të mbahet për shkak të problemeve me lagështi. Si dhe në shumicën e pavijoneve nuk ka çarçafë dhe mbulesa për jastëk që disa muaj”, thuhet në raporton e KMDLNJ-së, raporton KP.

Gjendja sa i përket higjienës nuk është në nivelin e duhur as në Qendrën Korrektuese për të mitur dhe femra në Lipjan. Sa i përketpjesës së burgut për  femra, sipas këtij këshilli, ka më shumë rregull, por ka edhe ujë të ngrohtë.

“Banjat janë të përbashkëta ndërsa tualetet janë nëpër dhoma dhe janë të hapura, në shumicën e tualeteve ka rrjedhje të ujit. Nëpër dhoma dhe korridor ka lagështi dhe mbajtja e pastërtisë është e vështirësuar. Furnizimi me ujë të ngrohtë është i kënaqshëm. Çarçafët ndërrohen dhe pastrohen çdo 15 ditë, ndërsa rrobat pastrohen në lavatriçe çdo javë. Furnizimet me mjete higjienike janë në nivel por cilësia është shumë e dobët”, thuhet në raport.

Ndërsa në qendrën  të miturve, sipas KMDLNJ-së, banjat janë të përbashkëta, në shumicën e tualeteve tavani është i mykur nga rrjedhja e ujit, ndërsa pastërtia nuk është në nivel.

“Furnizimi me ujë të ngrohtë është i kënaqshëm edhe tek të miturit. Ata pastrohen 3-4 herë në javë. Mbulesat ndërrohen dhe pastrohen çdo 15 ditë, ndërsa rrobat pastrohen çdo javë. Furnizimet me mjete higjienike janë në nivel, por cilësia është e dobët”, thuhet në raport, transmeton Albinfo.Ch.

Edhe në Burgun për Siguri të Lartë në Gërdoc, sipas KMDLNj-së, të gjitha dhomat-qelitë janë të pajisura me banjo të cilat nuk janë të ndara nga hapësira tjetër e dhomës. Kurse banjot e pastrimit janë të përbashkëta dhe i kanë të ndara ditët e pastrimit, thuhet në raportoj e këtij këshilli.