Kuvendi i Kosovës i ngathët, për 8 muaj ka mbajtur 17 seanca

Derisa vitin e kaluar ka përmbushur vetëm 34 për qind të agjendës, sivjet Kuvendi i Kosovës brenda 8 muajve ka zhvilluar vetëm 17 seanca plenare

© 2016 KEYSTONE

Kjo nomenklaturë e Kuvendit të Kosovës, që është e pesta pas luftës, është treguar më e ngathët në përmbushjen e agjendës legjislative. Derisa vitin e kaluar ka përmbushur vetëm 34 për qind të agjendës, sivjet Kuvendi i Kosovës brenda 8 muajve ka zhvilluar vetëm 17 seanca plenare .

Sipas njoftimit, Kuvendi i Kosovës gjatë këtyre tetë muajve ka miratuar 35 ligje apo 25 për qind të agjendës legjislative për këtë vit. Ndërsa në procedurë të miratimit janë 20 ligje, kurse në pritje 80 të tjera, raporton “Zëri”.

Deputetët e opozitës thonë se numri i vogël i seancave pas bojkotimit të punës së Kuvendit nga opozita dëshmon se koalicioni qeverisës nuk është serioz dhe se vendi ka nevojë për zgjedhje të reja të parakohshme, në mënyrë që të zgjidhet legjislacioni dhe qeveria e re.

Teuta Haxhiu është deputete e Aleancës për Ardhmërinë e Kosovës. Ajo ka thënë se fatkeqësia e kësaj legjislature janë Marrëveshja për Asociacionin e Komunave me shumicë Serbe dhe ajo për Demarkacionin me Malin e Zi, pasi, sipas saj, nënshkrimi i këtyre marrëveshjeve ka krijuar situatë kur puna e Kuvendit nuk mund të ishte më normale.

“Situata e krijuar pas këtyre dy marrëveshjeve e ka pamundësuar zhvillimin normal të punës së Kuvendit. Edhe pasi ne kemi dalë nga Kuvendi është vërtetuar se ne kemi pasur të drejtë kur kemi thënë se nuk mund të ketë normalitet në Kuvend derisa të anulohen këto dy marrëveshje. Edhe pasi kemi dalë ne, Kuvendi ka vazhduar me intensitet të ulët punën, ka pasur pak seanca dhe janë miratuar pak ligje”, është shprehur Haxhiu.