Kompanitë e sigurimeve, për 7 muaj humben 11.5 milionë €

Derisa në periudhën e njëjtë të vitit paraprak humbjet e sigurimeve ishte vetëm 2.5 milionë €, sivjet sipas Bankës Qendrore të Kosovës, humbjet kanë arritur në 11.5 milionë €

Vetëm gjatë 7 muajve të parë të këtij viti, kompanitë e sigurimeve në Kosovë kanë humbur 11,5 milionë euro, ose 9 milionë euro më shumë nga periudha e njëjtë e vitit të kaluar. Kështu thuhet në raportin e fundit të Bankës Qendrore të Kosovës publikuar për kompanitë e sigurimeve dhe bankave.

Sipas BQK-së, kompanitë e sigurimeve vazhdojnë ta ushtrojnë veprimtarinë e tyre me bilanc negative. Derisa në periudhën e njëjtë të vitit paraprak humbja e sigurimeve ishte vetëm 2.5 milionë euro, sivjet siç raportin “Zëri” humbjet kanë arritur në 11.5 milionë euro.

Në raportin e fundit të Bankës Qendrore të Kosovës shihet se nga fillimi i viti e deri në fund të muajit korrik të hyrat neto kanë qenë 34,9 milionë euro, derisa dëmet e ndodhura kanë qenë rreth 25 milionë euro, derisa shpenzimet tjera administrative kanë shkuar në 21,4 milionë euro.

0Në korrik të këtij viti numri i të punësuarve në kompani të sigurimeve ka qenë 1614, apo 130 më pak se në periudhën e njëjtë të vitit paraprak.

Ndërsa sa i përket bankave komerciale, për shtatë muajt e shkuar, bankat fituan 46.7 milionë euro. krahasuar me periudhën e njëjtë të vitit paraprak, shihet se fitimi i bankave sivjet është më i vogël për 5.9 milionë euro.