Në Kosovë, kërkohen më shumë të drejta për të zhvendosurit

Eksperti i OKB-së i të Drejtave të Njeriut shprehu gjithashtu shqetësimin lidhur me kushtet e jetesës së shumë personave të zhvendosur, sidomos ato që i përkasin komunitetit rom, ashkali dhe egjiptian

Duke përfunduar vizitën e tij pesë-ditore në Serbi dhe Kosovë, një ekspert i të drejtave të njeriut të Kombeve të Bashkuara i bëri thirrje Qeverisë së Serbisë dhe autoriteteve në Kosovë, për të gjetur një zgjidhje urgjente dhe të qëndrueshme për njerëzit që janë zhvendosur për gati 17 vjet, shkruan “un.org”,përcjell albinfo.ch.

“I bëj thirrje komunitetit ndërkombëtar që të mos mbyllë sytë para të zhvendosurve në Serbi e Kosovë dhe të mbështesë autoritetet në Serbi dhe Kosovë në përpjekjet e tyre për të gjetur zgjidhje të qëndrueshme dhe që çështja e të zhvendosurve të mbyllet njëherë e përgjithmonë”, tha Raportuesi Special i Kombeve të Bashkuara për të Drejtat e Njeriut të Personave të Zhvendosur brenda vendit, Chaloka Beyani, në një deklaratë për shtyp të lëshuar nga Zyra e Komisionarit të Lartë të OKB për të Drejtat e Njeriut (OHCHR), përcjell albinfo.ch.

Ai tha se ka ende 88 mijë persona të zhvendosur në Serbi dhe mbi 16 mijë në Kosovë, sipas Agjencisë së Kombeve të Bashkuara për Refugjatë.

Eksperti i OKB-së i të Drejtave të Njeriut shprehu gjithashtu shqetësimin lidhur me kushtet e jetesës së shumë personave të zhvendosur, sidomos ato që i përkasin komunitetit rom, ashkali dhe egjiptian.

“Këta të zhvendosurit kanë nevoja të veçanta për mbrojtje, sidomos në aspektin e qasjes në të drejtat e tyre të strehimit, punësimit, kujdesit shëndetësor dhe arsimit”, theksoi Beyani, duke shtuar se kjo duhet të trajtohet si një çështje urgjente.

Eksperti i OKB-së më tej theksoi se shqetësimet e personave të zhvendosur në Serbi dhe në Kosovë duhet të mbeten në rendin e parë dhe se kjo duhet të trajtohet si një komponent i rëndësishëm në kuadër të kornizës së anëtarësimit në Bashkimin Evropian dhe në kuadër të dialogut të Brukselit në mes të Beogradit dhe Prishtinës.

Gjatë vizitës së tij, për të vlerësuar progresin e bërë në rekomandimet e tij të mëparshme, Raportuesi Special i OKB-së ka parë disa hapa pozitivë që janë ndërmarrë, duke përfshirë edhe çështjet e banimit, tokës dhe pronës.