Shpërthen zjarr i madh në hotelin “Continental Park” në qytetin e Lucernës

Zjarrfikësit janë angazhuar në një operacion të madh për shuarjen e zjarrit, ndërsa tymi i dendur është parë mbi qytet.
Një zjarr i madh ka shpërthyer në hotelin “Continental Park” në qytetin e Lucernës, Zvicër. Pamjet e publikuara nga lexues të Blick tregojnë tym të dendur që del nga ndërtesa, ndërsa flakët kanë përfshirë çatinë e hotelit.

Në vendngjarje janë angazhuar forca të shumta zjarrfikëse, të cilat po luftojnë me përhapjen e zjarrit. Policia kantonale e Lucernës ka konfirmuar se është duke u zhvilluar një operacion i madh, por deri tani nuk ka dhënë detaje të tjera për shkaqet e zjarrit apo për persona të lënduar.
Nga pamjet e siguruara nga dëshmitarët shihet se zjarri ka përfshirë pjesë të çatisë së objektit, ndërsa një kolonë e madhe tymi është ngritur mbi qytet.

“Era e tymit është shumë e fortë. Jemi të tronditur, asnjëherë nuk kemi parë një zjarr të tillë në një ndërtesë”, ka thënë një dëshmitar për Blick, i cili ndodhej në një ndërtesë pranë hotelit.

Sipas tij, zjarrfikësit po përpiqen të pengojnë përhapjen e flakëve në ndërtesat përreth. Ekipet emergjente po përdorin shkallë të mëdha dhe po ndërhyjnë nga disa drejtime për të vënë nën kontroll zjarrin.
Një tjetër dëshmitar ka deklaruar se shumë kalimtarë janë mbledhur pranë vendit të ngjarjes, ndërsa atmosfera është e tensionuar për shkak të përmasave të zjarrit.

Autoritetet pritet të japin më shumë informacione pas përfundimit të operacionit të ndërhyrjes.