Dënimet e ashpra kanë shkaktuar shumë reagime në Kosovë

Qytetarët ankohen se nuk kanë para të paguajnë këso dënime marramendëse dhe ky ligj duhet të shqyrtohet edhe një herë

Në Kosovë që disa ditë ka hyrë në fuqi ligji i ri për rregullat e trafikut rrugor, i cili parasheh gjoba të ashpra si për shoferët ashtu edhe për këmbësorët që thyejnë rregullat e komunikacionit, shkruan albinfo.ch.

Me këtë ligj janë përcaktuar rregullat e reja për shoferë, këmbësorë dhe për pjesëmarrësit tjerë në trafik, sistemi i pikëve negative, marrja e përkohshme përkatësisht anulimi i patentë shoferit, përdorimi i rripit të sigurisë sipas standardeve të Direktivave Evropiane, Kontrollimi mobil i rregullsisë teknike të automjetit, mbrojtja e ambientit etj.

Me ligjin e ri është paraparë edhe dënimi për dëmtimin e shenjave të komunikacionit, ku gjoba do të jetë 6000 euro, si dhe vendosja e radarëve me blic nëpër rrugë.

Vozitja nën ndikimin e alkoolit dënohet deri në 1500 euro, kurse nëse shenja tregon 50 km në vende afër shkollës dhe tejkalohet kjo shpejtësi, atëherë dënimi është deri në 900 euro. Gjithashtu ka edhe disa dënime të ashpra, madje edhe për këmbësorët.

Por, ky ligj i ri është komentuar shumë në Kosovë dhe ka sjell reagime të shumta. Shumica prej tyre janë shprehur se këto dënime janë shumë të ashpra, bazuar edhe në standardin e jetesës në Kosovë.

Qytetarët ankohen se nuk kanë para të paguajnë këso dënime marramendëse dhe ky ligj duhet të shqyrtohet edhe një herë. Policia e Kosovës është vënë në aksion dhe qysh në ditën e parë ka shpërndarë me qindra dënime, kurse parat do të shkojnë në buxhetin e Kosovës.