Duhet të ketë më shumë gra në Kuvendin e Kosovës

Ligji për Zgjedhjet e Përgjithshme parashikon që në listat e kandidatëve të secilit subjekt politik të ketë së paku 30 për qind të kandidateve gra. Por kërkohet që të ketë më shumë gra në Kuvend

Kuota gjinore në Kuvendin e Kosovës duhet të rritet edhe më shumë se që ka parashikuar Ligji për Zgjedhjet e Përgjithshme, sidomos në aspektin kualitativ. Kështu konsiderojnë ligjvënësit e Kosovës por edhe njohësit e çështjeve politike dh ato nga organizatat e grave.

Në Nenin 27 të këtij ligji parashihet që lista e kandidatëve të secilit subjekt politik të ketë së paku 30 për qind të kandidateve gra.

Luljeta Demolli është drejtoresh ekzekutive e Qendrës Kosovare për Studime Gjinore. Ajo vlerëson se rritja e numrit të grave në Kuvend, duke u bazuar në kompetencat e tyre profesionale, do të ndihmonte thellësisht në demokratizimin e mëtejmë të jetës politike.

“Kuvendi i Kosovës nuk ka shfaqur vetëdijesim të plotë për rëndësinë e gjinorizimit të proceseve politike. Rrjedhimisht, elementet patriarkale s’janë anashkaluar as nga institucioni më i rëndësishëm në vend. Në këto rrethana është e vështirë për gratë politikane që të fuqizohen maksimalisht në politikën vendimmarrëse pasi ato pengohen nga kufizimet e shumta partiake”, ka deklaruar Demolli.

Performancën e shumicës së grave deputete në Kuvendin e Kosovës Demolli e vlerëson me notë pozitive, duke marrë parasysh pengesat e shumta me të cilat ballafaqohen ato, citon gazeta “Zëri”.

Deputetja nga radhët e Partisë Demokratike të Kosovës, Blerta Deliu, thekson se është e rëndësishme që prezenca e tyre në Kuvendin e Kosovës të sigurohet me vota dhe mbështetje. “Mendoj se gratë për çdo ditë e më shumë e kanë bindur elektoratin edhe votuesin se ato duhet të jenë në Kuvend jo për kuotë, por për shkak se kanë qenë vërtet në nivel të detyrës”, është deklaruar Deliu.

Sipas saj, pavarësisht këtij hovi që kanë marrë gratë në përfshirjen e tyre në vendimmarrje prapë fuqia më e madhe u mbetet burrave.

“Ne duhet të bëjmë përpjekje që përmes punës dhe angazhimit të sigurojmë përfshirje në institucione të Kuvendit, gjithmonë duke e arritur atë me përkushtim dhe me punë”, ka përfunduar deputetja Deliu.

Kuvendi i Kosovës në këtë legjislaturë ka 39 deputete, një më pak se në mandatin e kaluar, potencon deputetja nga radhët e Lëvizjes “Vetëvendosje”, Albulena Haxhiu.