Makolli vizitoi pikën kufitare “Dheu i Bardhë”

Vizita u bë në vazhdën e vizitave të tij nëpër pikëkalimet kufitare për të lehtësuar procedurat kufitare për mërgimtarët

Ministri i Diasporës,　Ibrahim Makolli, ka vizituar pikën kufitare “Dheu i Bardhë”, në Kamenicës, ku është njoftuar për së afërmi me procedurat　 e hyrje – daljes së automjeteve, që në këtë kohë kryesisht janë të mërgimtarëve që vijnë për pushime në Kosovë.

Makolli ka biseduar me autoritetet policore kufitare dhe me pjesëtarë të Doganave të Kosovës, nga të cilët u informua se procedurat kufitare të automjeteve që hyjnë në Kosovë në këtë fazë janë të shpejta dhe se nuk është vërejtur ndonjë pengesë eventuale që do të mund të ndikonte në pritje të gjata të automjeteve për të hyrë në Kosovë.

Vizita e ministrit Makolli në pikën kufitare “Dheu i Bardhë”, u bë në vazhdën e vizitave të tij monitoruese nëpër të gjitha pikëkalimet kufitare të Republikës së Kosovës, me qëllim të krijimit të lehtësirave procedurale kufitare për mërgimtarët.