Ban Ki-Moon shprehu domosdoshmërinë për siguri në Kosovë

Ministri i Punëve të Jashtme i Kosovës, Enver Hoxhaj ka takuar në Nju Jork sekretarin e Përgjithshëm të Kombeve të Bashkuara, Ban Ki- Moon, të cilin e ka informuar për pabarazinë në marrëdhëniet e lira tregtare në mes të Kosovës dhe Serbisë, si dhe për gjendjen në veri të Kosovës, duke shprehur përkushtimin e Qeverisë së Kosovës për paqe dhe stabilitet.

Nga ana tjetër, sekretari i KB-ve, Ban Ki-Moon shprehu domosdoshmërinë për siguri në Kosovë dhe përshëndeti rolin shumë pozitiv të KFOR-it në përmbushjen e këtij synimi.

Ai ka theksuar se është shumë me rëndësi që t’i dëgjojë qëndrimet e të dy palëve dhe ka mirëpritur takimin me ministrit të Punëve të Jashtme, Enver Hoxhaj.

Duke folur për gjendjen e sigurisë në veri të Kosovës, ministri Hoxhaj ka akuzuar Serbinë për krijimin e tensioneve ndëretnike në veri të Kosovës në 12 vjetët e fundit.