Angazhohen për bashkëpunim në fushën e energjetikës

Zëvendësministri I Ekonomisë, Tregtisë dhe Energjetikës të Shqipërisë, Enno Bozdo  ka takuar në Tiranë Ministrin e Zhvillimit Ekonomik të Kosovës, Besim Beqaj.

Marrëdhëniet ekonomike mes dy vendeve, dhe hapat konkretë të këtyre marrëdhënieve pas reciprocitetit që Kosova i ka vënë Serbisë ka qenë pjesë e bisedës mes Bozgos dhe Beqajt.

Për Ministrin e Zhvillimit Ekonomik të Kosovës, synimi i këtij takimi ishte rritja e bashkëpunimit ekonomik mes Republikës së Shqipërisë dhe Republikës së Kosovës.

Sipas tij, Shqipëria është parë nga Kosova si një treg me potencial të madh për bashkëpunim ekonomik në Republikën e Kosovës.

Ndërsa zv.ministri Bozgo, duke u ndalur tek aplikimi më i fundit i Kosovës, për parimin e reciprocitetit, ka theksuar se qeveria e Shqipërisë mbështet dhe mirëkupton hapat e fundit të qeverisë së Kosovës për aplikimin e parimit të reciprocitetit, i cili është brenda të gjithë mekanizmave që marrëveshja tregtare CEFTA ka parashikuar.

Sipas tij, kjo është një çështje që i takon jo vetëm Shqipërisë e Kosovës, por bashkëpunimit ekonomiko- tregtar të të gjitha vendeve të rajonit.

Gjatë këtij takimi është folur dhe për bashkëpunimin energjetik.

“Linja 400 kv Tiranë-Prishtinë, është duke bërë progres, kjo linjë do të plotësojë më së miri unazën e energjisë brenda vendeve tonave dhe shkon në përputhje të plotë me të gjithë strategjinë e komunitetit të energjisë, i cili synon të përmirësojë rrjetin e shpërndarjes, prodhimin e energjisë alternative dhe asaj të rinovueshme”, ka deklaruar Bozdo .

Kosova është duke planifikuar prodhimet alternative të energjisë elektrike në vitin 2020, një plan që kërkon bashkëpunim në nivel rajonal.