Rrëzohet shtylla e urës në autostradën “Arbër Xhaferi”

Shembja e kësaj shtylle, është shkaktuar pas një shembje të dheut, që ka ndodhur në rajonin e Kaçanikut

Njëra nga shtyllat gjigante të betonit, në të cilën ishte planifikuar të vendoset një urë e autostradës ”Arbër Xhaferi” në afërsi të Kaçanikut, është rrëzuar, duke treguar për vështirësitë me të cilat po ballafaqohet kompania “Bechtel-Enka” e cila ka fituar tenderin për ndërtimin e autostradës Prishtinë-Shkup.

Shembja e kësaj shtylle, siç raporton “Monitor” është shkaktuar pas një shembje të dheut, që ka ndodhur në atë pjesë. Nuk dihet nëse ka pasur njerëz të lënduar, pasi që kompania nuk ka dhënë detaje lidhur me rrëzimin e kësaj shtylle.

“Po ma merr mendja qe Bechtel-Enka ka me na tregu se çka ka ndodhe ne afërsi te Kaçanikut pas një shembje dheu. Siç shihet ne foto (sot) një shtylle e urës ka pësuar lëvizje te mëdha. Shpresoj se nuk ka te lënduar”, ka shkruar gazetari Fatos Bytyqi, që i ka postuar edhe fotografitë nga vendi i ngjarjes.

Rajoni i Kaçanikut njihet si zonë ku vazhdimisht ka rrëshqitje të dheut. Edhe vitin e kaluar, magjistralja Kaçanik-Han i Eelezit ishte bllokuar nga shembja e dheut. Edhe traseja e autostradës “Arbër Xhaferi” në anën e Kaçanikut është dukshëm më e vështirë se pjesa tjetër e rrafshit të Kosovës.