Policia kosovare konfiskon 2 milionë euro të falsifikuara

Sipas një njoftimi të Policisë, paratë e falsifikuara po silleshin nga Shqipëria në Kosovë me një automjet TAXI me targa shqiptare. I arrestuar është një shqiptar dhe një shtetas i Kamerunit

Policia e Kosovës në bashkëpunim me zyrtarët Doganor kanë konfiskuar sot në pikëkalimin kufitar Vermicë-Morinë, mbi 2 milionë euro të falsifikuara të cilat po silleshin nga Shqipëria për në Kosovë. Sipas një njoftimi të Policisë, paratë e falsifikuara  po silleshin me një automjet TAXI me targa të Shqipërisë.

“Vetura drejtohej nga B.D, i lindur më 1972, mashkull, shtetas i Shqipërisë dhe për pasagjer kishte: F.B, i lindur më 1980, mashkull, shtetas i Kamerunit, me leje qëndrimi në Francë. Gjatë kontrollit të përbashkët nga zyrtarë të të dy institucioneve, në bagazh të automjetit në një çantë, në brendësi të saj janë gjetur paketime të ndryshme kartëmonedhash të dyshuara si të falsifikuara me vlerën e: 500, 200, 100 dhe 50 euro. Po ashtu, së bashku me to është gjetur edhe letër e paketuar dhe e prerë në dimensione që i përgjigjen masës së kartëmonedhave: 500, 200, 100, 50 euro”, thuhet në njoftimin e Policisë.

Pas numërimit të kartëmonedhave të falsifikuara, rezulton të jenë: dy milionë e njëqind e tridhjetë e një mijë (2.131.000) euro, si dhe dy mijë e shtatëqind e tridhjetë e tre (2733) copë letër e bardhë që do të përdorej  për përpunim e kartëmonedhës 500 eurosh.

Policia si provë materiale ka konfiskuar kartëmonedhat e dyshuara si të falsifikuara, si dhe tetë (8) shishe me preparate kimike që përdoren për falsifikim, tri (3) folija alumini, një pako doreza plastike, dy shiringa, dy pasaporta të Kamerunit, një patentë shoferi dhe një  leje qëndrimi për në Francë.

Me urdhër të prokurorit të shtetit – Departamenti i Krimeve të Rënda në Prizren dy të dyshuarit janë dërguar në mbajtje.