Nuk kanë partner të flasin për veriun?

Zyrtarët e Kosovës nuk shohin njeri që i shkon fjala në veriun e banuar me serbë e të cilin do ta konsideronte partner për të biseduar në gjetjen e një zgjidhjeje për këtë pjesë.

Ministri i Brendshëm, Bajram Rexhepi, ka thënë se në këtë pjesë nuk ka njerëz me të cilët mund të flitet.

Qeveria i sheh si ilegalë përfaqësuesit e veriut të Mitrovicës dhe të Leposaviqit, Zubin-Potokut dhe Zveçanit, që kanë marrë pushtet nëpërmjet zgjedhjeve që Serbia ka organizuar në Kosovë.

“Ata nuk mund të jenë partnerë”, ka thënë ministri Rexhepi, shkruan “Koha Ditore”.

Qeveria ka kundërshtuar mundësinë që të ketë një dialog politik, apo që për veriun të ketë aranzhmane ndryshe nga ajo që parasheh Pakoja e Ahtisaarit.

Sipas kësaj gazete zëvendëskryeministri Hajredin Kuçi ka thënë se Qeveria nuk do të përpiqet të gjejë zgjidhje për këto tema as me Serbinë e as me përfaqësuesit ilegalë të serbëve të veriut.

Me përfaqësuesit që Kosova i konsideron ilegalë dialogojnë KFOR-i dhe EULEX-i.

Po kështu, për temat që trajtohen në Bruksel edhe përfaqësuesit e Serbisë në dialog me Kosovën zhvillojnë konsulta me kryetarët ilegal të komunave të veriut.