Avokati i Popullit i shqetësuar me vrasjet në vend

Avokati i Popullit, Sami Kurteshi, ka shpreh shqetësimin e tij jashtëzakonisht të madh, lidhur me vrasjet që po ndodhin në vend, e që tashmë dukshëm po shënojnë trend rritjeje.

Rasti i së enjte në Istog, ku është vrarë një dhe janë plagosur dy qytetarë serbë; rasti i vrasjes së një qytetari shqiptar të mërkurën në komunën e Gjakovës, sikurse edhe rasti tjetër, gjithashtu në komunën e Gjakovës, ku para disa ditësh ishin gjetur të vrarë dy rinj të fejuar, edhe njëherë konfirmon faktin se armët në duart e qytetarëve vazhdojnë të rrezikojnë drejtpërdrejt jetën e secilit person në vend, si dhe të cenojnë sigurinë dhe qetësinë publike.

“Identifikimi i fajtorëve dhe vënia e tyre para organeve të drejtësisë është veprim i domosdoshëm, jo vetëm për të zbardhur rastet që kanë ndodhur, por edhe për të parandaluar aktet e tilla dhe për të ndikuar në sigurinë e përgjithshme në vend”. Ka thënë Kurteshi.

sipas tij jo më pak shqetësuese, mbeten aktet e dhunës ndërmjet moshave të reja shkollore, përfshirë këtu posedimin dhe përdorimin e armëve të zjarrit si dhe atyre të ftohta nga ana e nxënësve.

Rasti i therjes me thikë të një nxënësi në komunën e Vitisë, nga një bashkëmoshatar i tij, po ashtu nxënës, risjellin para nesh, përveç shqetësimit, edhe kërkesën emergjente për të ndërmarrë masa që do të parandalonin aktet e tilla.

“Angazhimi i mekanizmave përkatës institucionalë dhe shoqërorë, për të ngritur nivelin e vetëdijes së përgjithshme kundër përdorimit të dhunës është i domosdoshëm, emergjent dhe kërkon vëmendje të veçantë”, ka theksuar avokati i popullit.