4 shtatori, Dita e Nënës Terezë në Nju Jork

Data 4 shtator do të jetë Dita e Nënës Terezë në Nju Jork të SHBA-së. Njoftimi ka ardhur nga Prici Leka 2, si dhe princesha shqiptare, Elia Zaharia Zogu

Është zyrtarizuar ‘Dita e Nënës Terezë’ në Kuvendin dhe Senatin e Shtetit në Nju Jork. Njoftimi ka ardhur nga Prici Leka 2, si dhe princesha shqiptare, Elia Zaharia Zogu, përcjell albinfo.ch.

“Në Senatin e Nju Jorkut me Assemblyman Mark Gjonaj, Presidentin e organizatës Rrënjët Shqiptare, Marko Kepi dhe anëtarët e organizatës në mbështetje të ligjit për Nënë Terezën. (Të shpallim 4 shtatorin Dita e Nënës Terezë në Nju Jork)”, ka shkruar princi shqiptar në “Facebook”.

Ndërkohë, princesha shqiptare këtë e ka quajtur një ditë historike. “Një ditë historike! Ndihemi të nderuar që u bëmë pjesë e këtij momenti të paharrueshëm!”, ka shkruar ajo.

Ajo gjithashtu ka falënderuar edhe diasporën shqiptare, derisa kanë shumë aktivitete në Nju Jork të SHBA-së. “Në familjen e mrekullueshme të filantropit Richard Lukaj. Jam e nderuar që na bashkoi në tryezën e tij me miq nga të gjitha trevat shqiptare! Dashuria për vendin është bashkuese, frymëzuese dhe trashëgohet në breza. Diaspora jonë është shembulli më i përkryer”, theksoi ajo.

Princesha shqiptare ka vizituar edhe organizatën ‘Rrënjët Shqiptare’ dhe punën patriotike që po e bën kjo organizatë. “Në këto ditë kaq të bukura në Nju Jork, një kënaqësi dhe emocion i veçantë ishte takimi i organizuar nga Albanian Roots. I uroj kësaj organizate patriote të kryesuar nga të rinj të motivuar në promovim të vlerave të kombit tonë, një të ardhme të shkëlqyer dhe sa më shumë sukses në paradën e shqiptarëve!”.