Cyrihu voton 60 për qind kundër heqjes së frëngjishtes nga shkollat fillore

Iniciativa kërkonte që gjuha e dytë e huaj të futej në program vetëm për ciklin e lartë (shkalla sekondare) të shkollës fillore

Votuesit në Kantonin e Cyrihut kanë hedhur poshtë me një shumicë të konsiderueshme prej 60 për qind, iniciativën popullore “Më shumë kualitet – një gjuhë e huaj më pak në shkollën fillore”, shkruan srf.ch. Kjo iniciativë kërkonte që gjuha e dytë e huaj të futej në program vetëm për ciklin e lartë (shkalla sekondare) të shkollës fillore, gjegjësisht nga klasa e gjashtë, transmeton albinfo.ch. Në një rast të tillë, asaj gjuhe – bëhet fjalë për frëngjishten – do t`i kushtoheshin numër më i madh i orëve të mësimit në ciklin e lartë.

Sipas iniciuesve, sistemi i sotëm shkollor ngarkon shumë nxënësit. E në mesin e iniciuesve është edhe Shoqata e Mësuesve e Kantonit të Cyrihut. Kështu, pas humbjes në vota, kryetarja e kësaj shoqate, LIlo Latzsch është shprehur e zhgënjyer sepse “nuk ia dolëm të bindim me argumentet tona”, ka thënë ajo.

Ndërkaq, qeveria e kantonit ashtu si dhe shumica në parlament kanë qenë kundër iniciativës, të cilën e quajnë “hap mbrapa”. Sipas tyre, edhe shikuar nga ana politike e çështjes, iniciativa është me rrezik. Kjo për faktin se votuesit e Cyrihut , në viti 2008 kishin votuar në favor të konkordatit “Harmos” ndërsa me iniciativën e cila humbi, konkordati do të duhej të anulohej ose përshtatej.