SVP e Cyrihut, me iniciativë për kufizim të migracionit në nivel kantoni

Këtë iniciativë SVP-ja e Kantonit të Cyrihut e ka ndërmarrë si reaksion ndaj zbatimit, sipas saj, të pamjaftueshëm të iniciativës së votuar në nivel nacional kundër migracionit masiv, autore e së cilës ishte po ashtu SVP

Në Kantonin e Cyrihut, migracioni duhet të drejtohet nga vetë autoritetet e kantonit. Kështu, sipas SVP-së, ato do të merrnin ato si në drejtim të kufizimit të migrimit ose në përcaktimin e përparësisë së vendësve në tregun e punës, shkruan srf.ch.

Këtë iniciativë, SVP ka arritur ta kalojë edhe në Parlamentin e Kantonit, ndonëse me një shumicë fare të ngushtë dhe në mënyrë të përkohshme, transmeton albinfo.ch. Ajo i ka siguruar vetëm 60 vota, që është minimumi i kërkuar për të proceduar me iniciativën në parlament. Krahas SVP-së ka votuar vetëm edhe partia minore, EDU ndërsa të gjitha të tjerat kanë qenë kundër.

Këtë iniciativë SVP-ja e Kantonit të Cyrihut e ka ndërmarrë si reaksion ndaj zbatimit, sipas saj, të pamjaftueshëm të iniciativës së votuar në nivel nacional kundër migracionit masiv, autore e së cilës ishte po ashtu SVP.

Mbi bazën e iniciativës më të re të prezantuar nga deputeti Gregor Rutz, Qeveria e Kantonit duhet të përpunojë një dokument të cilin ia kthen sërish parlamentit për votim.

Sipas Rutz, “tepër shumë vende pune zihen nga të huajt sidomos në kanton, i cili është edhe punëdhënësi më i madh”, ka thënë ai. Po ashtu, ai ka tërhequr vërejtjen se “në vendin tonë vijnë tepër shumë njerëz që nuk i nevojiten ekonomisë sonë. Dhe ata që i nevojiten, nuk vijnë”.

Por partitë tjera e kanë kritikuar këtë iniciativë, secila nga këndvështrimi i vet, përcjell albinfo.ch. Kështu SP ka thënë në një reagim të saj se kjo iniciativë është një recept i gabuar për të mbrojtur punëtorët vendorë, kështu që ne i mbështesim edhe më tutje masat e marra në nivel nacional”. Ndërsa  për FDP-në, kjo iniciativë përbën shkelje masive mbi tregun liberal të punës.