Kush shkel ligjin si i mitur, rrezikon më shumë ta shkelë edhe si i rritur

Te personat të cilët në moshën para pjekurisë (pa i mbushur 18 vjet) janë dënuar katër herë, rreziku për përsëritje të delikteve ngrihet në 65 për qind!

Të rinjtë, të cilët më parë, si të mitur janë regjistruar si delinkuentë,  kanë më shumë gjasa që edhe si të rritur të bien në kundërshtim me ligjin. Në një përfundim të tillë ka ardhur një analizë e Zyrës Federale për Statistikë, e publikuar sot, shkruan srf.ch.

Ekspertët e zyrës së përmendur kanë hulumtuar 6649 persona të vitit të lindjes 1992, të cilët në moshën e miturisë kanë bërë shkelje ligji, transmeton albinfo.ch. Kryesisht bëhet fjalë për shkelje të rregullave të komunikacionit dhe për delikte droge.

Sipas studimit, te të rinjtë të cilët si të mitur janë dënuar vetëm një herë penalisht, rreziku për recidivizëm (shkelje të serishme të ligjit) është 20 për qind më i madhe se te ata që nuk janë dënuar asnjëherë. Ndërsa te personat të cilët në moshën para pjekurisë (pa i mbushur 18 vjet) janë dënuar katër herë, rreziku për përsëritje ngrihet në 65 për qind!