Ministri i jashtëm austriak thotë se në Prishtinë gratë paguhen për t’u mbuluar

Ministri i Jashtëm i Austrisë, Sebastian Kurz ka thënë që Bashkimi Evropian duhet të përshpejtojë afrimin e Ballkanit Perëndimor dhe të mos lejohet më rritja e ndikimit të Turqisë dhe Arabisë Saudite në këtë rajon.

Sipas Kurzit, në Prishtinë dhe në Sarajevë gratë paguhen për t’u mbuluar.

“Gratë paguhen që të bartin burka në publik, por ne nuk do të qëndrojmë duarkryq”, ka thënë Kurz për “Handelsblatt”.

Ministri i Jashtëm austriak ka ftuar BE-në që të mos e injorojë më Ballkanin Perëndimor edhe pse Evropa është duke u ballafaquar me Brexitin, krizën e refugjatëve dhe terrorizmin.

“Duhet të vazhdojmë të kemi rol aktiv në këtë rajon, që është shumë i rëndësishëm për BE-në, të përkrahim reformat dhe të luftojmë kundër radikalizmave dhe të ofrojmë perspektivë evropiane”, ka shtuar ai.

Ndikimin islam nga Arabia Saudite e kishte theksuar edhe Qeveria gjermane në muajin maj. “Disa organizata nga Arabia Saudite janë shumë aktive në Kosovë, duke shpërndarë interpretimin Wahhabi të islamit, duke dërguar predikues”, ishte thënë në deklaratë.