Panucci: Xhaka ka gabuar, por çështja është mbyllur

Pas prezantimit të listës për dy ndeshjet e radhës në cilën ai la jashtë Xhakën, Panucci ka thënë se vet Xhaka dhe avokati i tij e kanë thirrur për t’i kërkuar falje

Përzgjedhësi i ri i kombëtares shqiptare, Christian Panucci thotë se mesfushori Taulant Xhaka i ka kërkuar falje për gabimet dhe se kjo çështje tashmë është e mbyllur.

Pas prezantimit të listës për dy ndeshjet e radhës në kualifikimet për Botërorin “Rusia 2018”, në të cilën ai la jashtë Xhakën, Panucci ka thënë se vet Xhaka dhe avokati i tij e kanë thirrur për t’i kërkuar falje. Xhaka raportohej se nuk kishte pranuar të takohej me Panuccin kur e kishte ftuar strategu italian.

Panucci ka thënë po ashtu se sulmuesin Shkëlzen Gashi e ka lënë jashtë sepse ka zgjedhur lojtarë të tjerë.

“Dyert e kombëtares janë të hapura për të gjithë. Xhaka ka gabuar por më ka telefonuar ai dhe avokati i tij, çështja e është e mbyllur, i kam pranuar faljet e tij. Gashin,nuk e kam grumbulluar sepse kam zgjedhur lojtarë të tjerë. Në të ardhmen mund të kthehet në kombëtare”, ka thënë Panucci.

Ndeshja e pare është ajo e datës 2 shtator ora 18:00 Shqipëri-Lihtenshtejn e cila do te zhvillohet ne stadiumin “Elbasan Arena” dhe më pas më 5 shtator, ndeshja e radhës në Strumica të Maqedonisë, Maqedoni-Shqipëri.