Autobusi rrokulliset 20 metra në humnerë, 7 të lënduar

Të gjithë janë transportuar me autoambulancë dhe me helikopter në spital, por asnjëri nuk ka pësuar lëndime me rrezik për jetën

Foto ilustrim

Një autobus me regjistrim të Kantonit Zug, është aksidentuar të shtunën deri sa po kalonte rrugës në qafën malore Nufenenpass në Kantonin Valis, shkruan sda.ch Shoferi 59 vjeçar papritmas ka pësuar një ligështim të përcjellë me marramendje dhe e ka humbur kontrollin mbi timonin e autobusit.

Kjo ka pasur për pasojë daljen e autobusit nga rruga dhe rrokullisjen e tij në terrenin e pjerrët rreth 20 metra poshtë rrugës, transmeton albinfo.ch. Me këtë rast kanë pësuar lëndime 7 udhëtarë të autobusit, përfshirë këtu dhe shoferin, njofton Policia Kantonale e Valisit.

Të gjithë janë transportuar me autoambulancë dhe me helikopter në spital, por asnjëri nuk ka pësuar lëndime me rrezik për jetën.

Në autobus ndodhesin gjithsej 20 anëtarë të një shoqate. Në mesin e tyre nuk kishte fëmijë.

(Foto: Kapo Wallis)