Evitohet në momentin e fundit ndeshja e dronit dhe aeroplanit me 197 udhëtarë

Personeli kishte arritur ta identifikonte këtë objekt fluturues me një diametër prej një metri, por tashmë ishte tepër vonë për aeroplanin që të bënte ndonjë manovrim me qëllim shmangieje

Një dron dhe një aeroplan i tipit Airbus i Kompanisë Ajrore “Swiss”, vetëm dhjetë metra i ka ndarë nga përplasja e mundshme fatale.

Incidenti ka ndodhur më 6 maj 2017 në afërsi të Aeroportit të Cyrihut por Qendra për Hulumtime në fushë të Sigurisë SUST i ka njoftuar mediet vetëm sot në një raport të vetin të publikuar rishtas, shkruan srf.ch.

Aeroplani në fjalë, sipas këtij raporti, kishte në bord 197 persona, përfshirë këtu edhe personelin dhe ndodhej në fazën e aterrimit, transmeton albinfo.ch. Ai po vinte nga Dar Es Salami i Tanzanisë.

Personeli, gjegjësisht piloti zviceran dhe kopiloti më i ri, gjerman, qe informuar përmes radiolidhjes se në zonën e fluturimit të avionit ndodhej një dron. Personeli kishte arritur ta identifikonte këtë objekt fluturues me një diametër prej një metri, por tashmë ishte tepër vonë për aeroplanin që të bënte ndonjë manovrim me qëllim shmangieje.

SUST në raportin e saj mban qëndrimin se një dron i madhësisë së përmendur mund të dëmtonte rëndë aeroplanin.