Kaos valixhesh në Aeroportin e Cyrihut

Për shkak të ndërprerjes së shiritit transportues, valixhet është dashur të barten me karrocë për t`u futur në procesin e sortimit

Rënia nga sistemi e një shiriti për transportimin e valixheve ka shkaktuar një kaos të vertetë sot në Aeroportin e Cyrihut. Pasagjerët ishin të detyruar t`i linin valixhet në sallë, pa mundur që ato të sistemoheshin në shiritin përkatës, shkruan blick.ch. Dhe kjo ka ndodhur pikërisht në ditën e fillimit të pushimeve vjeshtore të shkollave në Zvicër, kur fluksi i njerëzve që i drejtohen aeroportit për të udhëtuar jashtë vendit është veçamërisht i madh.

Këtë dështim e ka konfirmuar edhe qendra përgjegjëse për bagazhin. Ajo ka sqaruar se për shkak të ndërprerjes në fjalë, valixhet është dashur të barten me karrocë për t`u futur në procesin e sortimit, transmeton albinfo.ch.

Policia Kantonale e Cyrihut ka qenë në vendin e ngjarjes për të mundësuar sigurinë. Kjo për faktin se valixhet qëndronin në sallë pa pronarët e tyre. Ndërkohë defekti është mënjanuar dhe ka filluar sërish sistemimi normal i bagazhit.