Kuvendi “shkel” Jahjagën, miraton mbikëqyrjen

Kuvendi i Kosovës ka miratuar të premten ndryshimin dhe plotësimin e 21 ligjeve me të cilët i jepet fund mbikëqyrjes ndërkombëtare të pavarësisë së Kosovës, ndërsa ka refuzuar kërkesën e Presidentes për heqjen e nenit 37, 38 dhe 39 nga Kodi Penal i Kosovës, që lidhen me çështjen medieve. Ndryshimet dhe plotësimet në këto 21 ligje është aprovuar në parim, me një projektligj të vetëm, i cili pritet të fuqizohet në shtator, kur edhe përfundon mbikëqyrja ndërkombëtare e pavarësisë. Ky projektligj është kundërshtuar nga ligjvënësit e Vetëvendosjes, të cilët konsiderojnë se mbikëqyrja nuk është reale, por kamuflim.   Ndërsa zëvendëskryeministri Hajredin Kuçi tha se mbikëqyrja ndërkombëtare e pavarësisë është përcaktuar me Planin Ahtiusari dhe është bërë në korrnim edhe me partnerët ndërkombëtarë. Ndërsa me miratimin e këtyre ligjeve, ai tha se mbikëqyrja merr fund.  

Miratohet Kodi Penal i Kosovës me tri nenet kontroverse

Ndërsa në vazhdim ligjvënësit e votuan edhe Kodin Penal të Kosovës, respektivisht tri nenet kontroverse të cilat lidhen me mediet, të cilat i ka kthyer mbrapa presidentja Jahjaga, pasi që ka konsideruar se ato shkelin të drejtën e informimit të lirë. Për heqjen e këtyre neneve votuan 59 deputetë, 4 ishin kundër, ndërsa 5 ligjvënës abstenuan. Kjo nuk mjaftoi që nenet të hiqen, sepse për ndryshimin e Kodit Penal duhet të jenë për, së paku gjysma e deputetëve të Kuvendit të Kosovës, që i bije 61 deputetë.  Kundër heqjes së këtyre tri neneve kryesisht deklaruan deputetët e partisë më të madhe parlamentare-PDK-së, të cilit fillimisht kërkuan që nenet të modifikohen. Zëvendëskryeministri dhe ministri i Drejtësisë, Hajredin Kuçi është ndier më së keqi në këtë mes, sepse ka premtuar që nëse nenet nuk hiqen nga Kodi Penal, ai jep dorëheqje nga posti i ministrit të Drejtësisë Vetë ministra e Kuçit ka qenë sponsor i këtij Kodi. Kuçi në seancë kërkoi që të hiqen nenet, por disa nga deputetët e Grupit Parlamentar të PDK-së nuk e dëgjuan, dolën jashtë seancës, në bufenë e Kuvendit.