Sulmohet me granatë shtëpia e një shqiptari

Rasti është paraqitur në policisë rreth orës 14:00, kurse granata e pashpërthyer është larguar nga KFOR-i

Në oborrin e një shtëpie shqiptare në pjesën veriore të Mitrovicës të banuar me shumicë serbe, është gjuajtur një granatë dore, por fatmirësisht nuk ka eksploduar. Ngjarja, sipas policisë, ka ndodhur në Lagjen e Boshnjkaëve, e cila është e banuar nga trio komunitetet, shqiptarë, serbë dhe boshnjakë.

Zëvendësdrejtori rajonal i Policisë së Kosovës për Mitrovicë, Ergin Mediq ka thënë se rasti është paraqitur në policisë rreth orës 14:00, kurse granata e pashpërthyer është larguar nga oborri i shtëpisë nga njësiti i specializuar i KFOR-it.

Ky akt konsiderohet edhe një formë presioni për shpërnguljen e shqiptarëve nga pjesa veriore e Mitrovicës, e banuar nga komuniteti serbë. Këta të fundit që nga paslufta (1999) kanë sfiduar institucionet e Kosovës, ndërkaq janë financuar në vijimësi nga Qeveria e Beogradit dhe për 13 vjet më radhë kanë funksionuar si strukturë paralele.

Ky lajm, ndërkaq është fokusuar edhe nga mediat serbe, të cilët apostrofojnë shqiptarët si komunitete që qëndron pas këtij rasti.

Кrstimir Pantiq është njëri nga përfaqësuesit ekstrem të serbëve përtej lumit Iber. Ai ka gjykuar sulmin me granatë dore që ka ndodhur në shtëpinë e shqiptarit në lagjen e Boshnjakëve. Ai ka thënë se bomba është hedhur në oborrin e shtëpisë të cilën shqiptari kohë më parë i ka shitur një serbi, ndërsa ditëve të fundit ka qenë duke i bartur gjësendet nga shtëpia.

Ndryshe, sulmet me armë dhe me bomba nuk janë të rralla në veriun e Kosovës. Disa ditë më parë me dy granata është sulmuar punkti i paqeruajtësve të KFOR-it, ndërsa nga vendosja e një eksplozivi plastik në dritare të banesë, dy muaj më parë ka mbetur i vdekur Slever Haradinaj nga lagja “tre rrokaqiejt”.