Gjilani i rrezikuar nga mbeturinat

Avokati i Popullit, Sami Kurteshi thotë se deponia në këtë gjendje shkakton rrezik permanent për jetën dhe shëndetin e njerëzve

Institucioni i Avokatit të Popullit (IAP) ka kërkuar nga institucionet e Kosovës që të reagojnë menjëherë për të sanuar keqmenaxhimin e deponisë së mbeturinave në rajonin e Gjilanit, sepse nga djegia e mbeturinave dhe shpërndarja e tyre, po e rrezikohet jeta e qytetarëve, veçanërisht të të miturve. Avokati i Popullit, Sami Kurteshi ka qëndruar vetë në këtë rajon dhe menjëherë ka shprehur shqetësim për gjendjen e krijuar. “Në terren është vërejtur keqadministrim i mbeturinave përbrenda deponisë, djegie e mbeturinave  dhe për pasojë ndotje e ajrit, ndotje në vazhdimësi e ujit dhe tokës nga shpërndarja e pakontrolluar e mbeturinave, që tashmë zë hapësirë rreth 500 metra jashtë rrethojës së deponinë, në pronë publike dhe private, e për më keq duke bllokuar rrugën nëpër të cilën barten mbeturinat për në deponi”, thuhet në reagimin e Ombudspersonit.  Situata, sipas këtij, institucioni, vlerësohet me rrezik permanent për jetën dhe shëndetin e njerëzve që jetojnë përreth kësaj deponie, kryesisht në këtë periudhë kur temperaturat janë shumë të larta. “Përveç derdhjes së mbeturinave jashtë deponisë, shqetësimin e Avokatit të Popullit lidhur me gjendjen  në këtë deponi, e shton fakti se në mbeturinat që hidhen aty, punojnë fëmijë të mitur që mbledhin hedhurina të caktuara, duke u vënë në këtë mënyrë para rrezikut të drejtpërdrejtë  për sëmundje të ndryshme, e së këndejmi edhe për jetën e tyre”, thuhet më tej në shqetësimin e Ombudspersonit.  Ky i fundit fton të gjithë faktorët relevant, organet kompetente të nivelit qendror dhe lokal, si dhe Qeverinë e Republikës së Kosovës, që të ndërmarrin masa të menjëhershme për të  administruar si duhet derdhjen e pakontrolluar të mbeturinave dhe sanimin e dëmeve. “Avokati i Popullit fton Prokurorinë dhe Gjykatën për marrjen në përgjegjësi ligjore të të gjithë individëve dhe institucioneve përgjegjëse”, thuhet në reagim.