Hoxha garanton për 91 njohje

Ministri Hoxhaj tha se numri i shteteve që është prezantuar në ueb-faqen e MPJ-së është numri i saktë i njohjeve që ka shteti i Kosovës

Shefi i diplomacisë kosovare, Enver Hoxhaj ka hequr dilemat rreth shteteve që kanë njohur shtetin e Kosovës. Në një intervistë dhënë për të përditshmen kosovare ”express” , ai thotë se Republikën e Kosovës e kanë njohur 91 shtete, ndërsa gjatë muajit korrik pritet që të konkretizohen edhe tri njohje të reja.

“Numri i shteteve që është prezantuar në ueb-faqe është edhe numri i saktë i njohjeve që ka shteti i Kosovës”, ka thënë ministri Hoxhaj duke garantuar se Kosovën e kanë njohur 91 shtete. Megjithatë numri një i diplomacisë në Prishtinë tha se nuk e di saktë se sa nota verbale kanë ardhur nga shtetet partnere.

“Njohjet nuk janë meritë e asnjë zyrtari individualisht”, ka thënë Hoxhaj duke precizuar se njohjet kanë ardhur falë koordinimit të punës së të gjithë aktorëve, nga Qeveria, Presidenca, Kryeministri, Zëvendëskryeministri Pacolli. “Në këtë pikë ka ndihmuar shumë edhe Strategjia e hartuar nga MPJ”, konsideron ai.

Me këtë intervistë Hoxhaj është mundur të heq “mjegullën” që është krijuar në opinion rreth numri të njohjeve të Kosovës. Në mediet e Prishtinës është raportuar se institucioneve të vendit iu mungojnë një numër i konsiderueshëm i notave verbale, dokumente valide që vërtetojnë njohjen e një shteti dhe gatishmërinë për marrëdhënie diplomatike bilaterale.

Po ashtu është thënë se disa nga njohjet që i ka proklamuar zëvendëskryeministri Behgjet Pacolli, janë vetëm njohje gojore, kryesisht njohja nga Uganda dhe Nigeria. “Me këto dy vende nuk kemi mbërri që të vendosim marrëdhënie të plota diplomatike sikurse kemi bërë edhe me vendet e tjera”, tha Hoxhaj.

Shefi i diplomacisë kosovare tha se zëvendëskryeministri Pacolli ka marrë disa shkresa nga presidentët e të dyja vendeve që ato e njohin subjektivitetin dhe shtetësinë e Kosovës.

Hoxha po ashtu ka fol edhe planet e ardhshme të diplomacisë dhe hapjen e pesë ambasadave të reja, ndërsa tha se Kosova sivjet nuk do të aplikojmë për anëtarësim në OKB.