Gordon:Serbia ta pranojë realitetin në Kosovë

Ndihmëssekretari amerikan për çështjet evropiane, Filip Gordon ka përsëritur të hënën në Prishtinë se Serbia duhet të përballet me realitetin e shtetit demokratik e sovran të Kosvovës

Gordon po vinte në Prishtinë nga Beogradi ku kishte takuar presidentin e sapozgjedhur Tomisllav Nikolliq, të cilit ia kishte përcjellë edhe njëherë qëndrimet e Shteteve të Bashkuara se Kosova është shtet i pavarur me integritet të plotë territorial.

“Pata rastin që të përcjell mesazhin amerikan në Beograd të cilin do ta përsëris edhe këtu se Shtetet e Bashkuar vazhdojnë të mbështesin fuqishëm sovranitetin dhe integritetin e Kosovës dhe se çfarëdo qeverie që formohet në Beograd ajo duhet t’i zbaton marrëveshjet e arritura në bisedimet Kosovë – Serbi”, ka thënë Gordon, raportojnë mediat në Prishtinë.

Nga ana tjetër presidentja e Kosovës, Atifete Jahjaga tha se Republika e Kosovës është një faktor i rëndësishëm i paqes dhe stabilitetit në rajon.

Turneu diplomatik i Ndihmëssekretari amerikan ka nisur nga 6 korriku me vizitat në Francë e Kroaci, për të vazhduar më pas me Serbinë, Kosovën dhe Qipron..