Nuk ka varrezë masive në Zhilivodë

Pas një muaj gërmimesh, hetuesin ndërkombëtarë kanë vërtetuar se në Zhilivodë nuk ka varrezë masive

Hetuesit e Misionit të BE-së për Sundim të Ligjit (EULEX) nuk kanë gjetur asnjë provë që vërteton se në fshatin Zhilivodë të Komunës së Vushtrrisë ka mbetje mortore. Pas shumë gërmimeve, hetuesit kanë ardhur në përfundim se në këtë lokacion nuk ka asnjë gjurmë të mbetjeve mortore të 26 serbëve.

Kjo ishte hera e tretë me radhë, që hetuesit ndërkombëtarë kishin gërmuar në Zhvilivodë për të vërtetuar nëse në vendin e quajtur “Maden” ka apo jo mbetje mortore lë luftës së fundit. Fillimisht, ishte UNMIK-u ai që nisi gërmimet por as atëherë nuk u gjet asnjë provë që vërteton dyshimet.

Tri javë më parë ky lokacion u përfshi nga flakët, por pas intervenimit të zjarrfikësve dhe Forcave kosovare të Sigurisë zjarri i lokalizua. Një hetues i EULEX-it së bashkë me një prokurorë vendorë kanë hulumtuar rastin, por nuk kanë dalë akoma me rezultate përfundimtare.

Gjatë luftës së fundit në Kosovë, janë zhdukur rreth 4 mijë qytetarë, shumica dërmuese shqiptarë të Kosovës. Eshtrat e mbi 2 mijë personave janë gjetur nëpër disa varreza masive në Serbi, ne Bajna-Bashta, Peruçac, Jagodine, Batajnica, etj, ndërsa edhe 1880 akoma figurojnë të zhdukur.

Forcat serbe të Milloshvqit i kishin bartur trupat e kosovarëve për në Serbi, në përpjekje për t’i zhdukur gjurmët e krimit. Disa ish-eprorë dhe politikanë serbë të asaj periudhe, janë gjykuar me dënime maksimale nga Gjykata për Krime lufte në Hagë, ndërsa disa të tjerë akoma po gjykohen.