Hiqet nga ligji neni që kufizon importin e veturave të vjetra

Pa asnjë votë kundër, anëtarët e Komisionit për Zhvillim Ekonomik kanë përkrahur iniciativën e deputetit Mërgim Lushtaku për ndryshimin e Ligjit të automjete

Deputetët e Kuvendit të Kosovës në Komisionin për Zhvillim Ekonomik kanë kërkuar ndryshimin e nenit 44 të Ligjit për automjete, me anë të të cilit kërkohet moslejimi i importit të automjeteve më të vjetra se dhjetë vjet.

Deputeti i PDK-së, Mërgim Lushtaku, tha se veturat e vjetra nuk janë problem kryesor për ndotje të ambientit, prandaj edhe duhet të lejohet importimi edhe i atyre që janë më të vjetra se 10 vjet.

Deputetja nga LDK-ja, Hikmete Bajrami, ka thënë se ndryshimi i nenit 44 për heqjen e kriterit për vjetërsinë e automjeteve duhet të analizohet mirë, ndërsa ka mbështetur ndryshimin e nenit 63 për procesin e regjistrimit të automjeteve.

Kufizimin e vjetërsisë për import të automjeteve e ka përkrahure dhe deputeti i VV-së, i cili tha se një veturë mund të jetë e vjetër, por ndoshta i plotëson kriteret dhe standarde për ndotje.

Por Avdi Kamerolli nga Ministria e Infrastrukturës ka thënë se nuk ka nevojë të bëhet ndryshimi i ligjit për heqjen e përkufizimit të veturave, sepse, sipas tij, Kosova shndërrohet në varreza me automjete të kalbura, të cilat rrezikojnë edhe trafikun.

Pa asnjë votë kundër, anëtarët e Komisionit për Zhvillim Ekonomik kanë përkrahur iniciativën e deputetit Mërgim Lushtaku për ndryshimin e Ligjit të automjete.