Vetëvendosje paralajmëron padi ndaj Thaçit

Lëvizja Vetëvendosje ka paralajmëruar padi ndaj presidentit Hashim Thaçi për keqpërdorim të politikës së jashtme.

Lëvizja Vetëvendosje ka paralajmëruar se së shpejti do të padisë presidentin e Kosovës, Hashim Thaçi, i cili pa mandat po dialogon me Serbinë.

Kryetari i grupit parlamentar të Vetëvendosjes ka thënë se presidenti ka bërë shkelje kushtetuese, e për këtë ai do të përballet me padi.

Konjufca ka thënë se të gjitha partitë politike duhet të bëhen bashkë në Kuvend për t’i vënë vija të kuqe presidentit, atij që i hoqi vijat e kuqe për Serbinë.

“Parlamenti duhet të thotë që Kosova nuk mund të pranojë kurrfarë autonomie për serbët, kurrfarë ‘Zajednice’, kurrfarë copëtimi të Kosovës a shkëmbimi territoresh”, ka thënë Konjufca.

Ai tutje ka thënë se Hashim Thaçi është politikani i vetëm që vrapon të jetë prijës në dialog, e kështu, mundohet të shtyjë edhe pak Gjykatën Speciale.

Ai ka paralajmëruar protesta e demonstrata për të kundërshtuar marrëveshjet e dëmshme.

Nuk është i sigurt nëse për këtë do ta ketë mbështetjen e LDK-së.

“Nuk e di nëse do të na bashkohet LDK-ja. Më duket se LDK-ja demonstratën e fundit e ka bërë në vitin 1993”, ka thënë ai.