Faton Topalli paraqet rezolutë për mërgimtarët

Ndër pikat që deputeti Topalli i ka paraparë në rezolutë është edhe heqja e përkohshme e pikave të kontrollit për mërgimtarët

Deputeti i PSD-së, Faton Topalli, e ka ngritur si çështje urgjente në Kuvendin e Kosovës, problemin e bashkatdhetarëve.

Ai ka thënë se më e pakta që mund të bëjnë deputetët është që t’ua lehtësojnë procesin e ardhjes, përcjell albinfo.ch.

Sipas Topallit, duhet vullnet politik për t’i zvogëluar pritjet e gjata në kufi, ndërsa ka thënë se duhet të bëhet një Rezolutë.

“Të hiqen procedurat e përditshme të kontrollit të kalimit kufitar për bashkatdhetarët tanë, në të gjitha pikat kufitare të Kosovës, përfshirë këtu edhe Aeroportin e Prishtinës. Hyrja e veturave të bashkatdhetarëve nëpër këto pika, të bëhet pa iu nënshtruar kontrollit të domosdoshëm, ndërsa kontrolli i tyre të bëhet me metodën e rastit. Gjatë hyrjes në kufi të kërkohet vetëm posedimi i policës kufitare për makina që siguron dëmet e mundshme”, ka lexuar ai Rezolutën e propozuar.

Kjo Rezolutë, sipas tij, do të aplikohet për periudhën 6 korrik 2018 deri më 31 gusht 2018. Ministria e Punëve të Brendshme është përgjegjëse për ta zbatuar Rezolutën.

Kryetari i Kuvendit të Kosovës, Kadri Veseli, ka kërkuar që të mos politizohet kjo çështje dhe ka shtuar se duhet të vazhdojnë punën me grupet parlamentare së bashku me MPB-në, për të vazhduar më pas me procedimin e kësaj rezolute.