Maqedonia më e mira në rajon për biznes

Sipas revistën “Forbs” Maqedonia është radhitur në vendin e 37 për bërje të biznesit, ndërsa Shqipëria e 74-ta

Revista financiare amerikane “Forbs” ka publikuar listën e shteteve më të përshtatshme për bërje të biznesit. Në mesin e 141 vendeve, Maqedonia është radhitur në vendin e 37, duke lënë mbrapa pothuajse të gjitha vendet e rajoni, Malin e Zi, Kroacinë, Shqipërinë e Serbinë. 

Sipas kësaj liste, Shqipëria është radhitur vendin e 74, ndërsa Mali i Zi është radhitur në vendin e 45, Kroacia në vendin e 47, Bullgaria në vendin e 49, Turqia në të 52-tën, Greqia 68, Bosnja e Hercegovina në vendin e 85, Serbia në vendin e 90, ndërsa Kosova nuk është përfshirë në këtë listë. 

Maqedonia sipas “Forbs” është radhitur më e mira sipas kategorive për liri monetare dhe burokraci. Në kategorinë për mbrojtën e investitorëve, Maqedonia radhitet në vendin e 19-të, në politikat tatimore në vendin e 22-të, në tregtinë e lirë 48, korrupsionin 40 dhe teknologjinë në vendin e 69-të. 

Zelanda e Re, siç raportoi INA, është radhitur në krye të listës së Forbs, për shkak të transparencës dhe klimës stabile juridike, e cila nxit ekonominë. Në vendin e dytë është Danimarka dhe më pas vijojnë Hong Kongu, Singapori, Kanadaja, Irlanda, Suedia, Norvegjia, Finlanda dhe Britania e Madhe. 

SHBA-të në këtë listë qëndrojnë në vendin e 12, e cila vitin e kaluar ishte e 10, ndërsa në vitin 2009 në vendin e dytë. Forbs e përpilon këtë listë duke u bazuar në raportet e CIA, Freedom House, Heritage Foundation, Property rights aliance, Transparency International, Banka Botërore dhe Forumi Botëror Ekonomik.