Laureat i çmimit “Bekim Fehmiu” këtë vit është Besim Sahatçiu

Ministria e Kulturës ka ndarë çmimet vjetore në fushën e kinematografisë

Juria e Çmimeve në Fushën e Kinematografisë ka vlerësuar se veprimtaria kinematografike e regjisorit Besim Sahatçiu konsiderohet themeltare e regjisurës kinematografike të Kosovës, që e avancoi atë në kinematografi konkurruese në rajon.

Kjo juri i ndau çmimin për Veprimtari Jetësore “Bekim Fehmiu” post mortum Besim Sahatçiut. Ndërsa Çmimi Vjetor për Veprimtari Kinematografike iu dha regjisores Blerta Zeqiri.

“Jam e gëzuar, sepse më është dukur që Besimi është harruar, por ja që erdhi koha dhe u nderua me këtë çmim”, ka thënë bashkëshortja e Besim Sahatçiut, Besa, përcjell albinfo.ch.

Ministri i Kulturës, Kujtim Gashi, u zotua edhe një herë që do të vazhdojë përkrahja për kinematografinë kosovare. “Ju uroj për çmimet. Besoj që kemi pasur një juri profesionale për t’u ndarë çmimet. Ne jemi të përkushtuar që të motivojmë punën e artistëve dhe në kuadër të këtij qëllimi do të vazhdojmë të japim shpërblime e çmime”, tha Gashi.