SHKK suspendon zyrtarë pas vetëvarjes së një të burgosuri

Shërbimi Korrektues i Kosovës ka njoftuar se janë suspenduar zyrtarë të burgut të Dubravës pas vetëvarjes së një të burgosuri.

Shërbimi Korrektues i Kosovës ka njoftuar se i paraburgosuri me inicialet I.K., i lindur më 22.11.1987 nga fshati Tërpezë, komuna e Malishevës, është vetëvarur në orët e hershme të mëngjesit të sotëm.

“I paraburgosuri I.K. ishte arrestuar më 10.04.2018 dhe ishte pranuar në Qendrën e Paraburgimit në Prizren, ndërsa në Qendrën Korrektuese në Dubravë është transferuar më 03.07.2018. Vepra me të cilën ngarkohej ishte vrasje e rëndë në tentativë dhe kishte vazhdim të paraburgimit deri më 08.09.2018”, thuhet në njoftim. 

Sipas SHKK-së, i paraburgosuri I. K. është pranuar në krahun psikiatrik të stacionarit të Qendrës Korrektuese në Dubravë pas transferit nga Qendra e Paraburgimit në Prizren më 03.07.2018, shkruan albinfo.ch.

“Nga data 30.07.2018 deri më 20.08.2018 ka qenë i hospitalizuar  në Institutin e Psikiatrisë Forenzike të Kosovës në QKUK, në Prishtinë me Dg.F 43, X 78. Për shkak të vetëlëndimeve dhe tentim vetëvarjes është trajtuar në vazhdimësi nga mjekët e burgut, psikiatri dhe psikologu. Për rastin janë njoftuar autoritetet kompentente, Prokuroria, Gjykata, Policia e Kosovës si dhe familja e të ndjerit”, ka njoftuar tutje SHKK.

 Menaxhmenti i lartë i Shërbimit Korrektues dhe Udhëheqësi i Shërbimit Shëndetësor për Burgje nga Ministria e Shëndetësisë, duke kërkuar një hetim profesional dhe të  pavarur  mbi përgjegjësinë e mbikëqyrjes së  zyrtarëve përgjegjës, ka marrë vendim  që të suspendohen dy zyrtarë korrektues dhe dy infermierë deri në përfundimin e hetimit të rastit.