Serbët e veriut pajisen me dokumente kosovare

Zëdhënësi i Komunës së Mitrovicës, Ahet Jashari tha se gjatë vitit të kaluar afër 4 mijë qytetarë serbë janë pajisur me dokumente kosovare

Qytetarët serbë të veriut të Kosovës, përkundër presionit të vazhdueshëm nga strukturat paralele serbe, gjatë vitit 2012 kanë treguar interesim të madh për t’u pajisur me dokumente personale të Republikës së Kosovës. Sipas zëdhënësit të komunës së Mitrovicës, Ahet Jashari, gjatë vitit të kaluar afër 4 mijë qytetarë serbë janë pajisur me dokumente kosovare.

Ndërkaq Afrim Voca, koordinator i gjendjes civile në Komunën e Mitrovicës, ka thënë se interesimi i qytetarëve të veriut për dokumente personale të shtetit të Kosovës është rritur dukshëm në vitin e fundit.

“Numri është shumë më i madh, numri po vjen duke u rritur çdo ditë e më shumë. Numri i lëndëve të kryera në zyrën e gjendjes civile prej janarit deri në dhjetor të vitit 2012  është 3 mijë e 479”, tha Voca, sipas të cilit, qytetarët serbë kanë treguar interesim për dokumente të ndryshme personale si, certifikata të lindjes 1074, certifikata të shtetësisë 1043, certifikata vendbanimi 1224.

Ai sqaron se këto dokumente janë lëshuar nga zyra e gjendjes civile në Komunën e Mitrovicës dhe zyra e gjendjes civile e cila funksionon në Lagjen e Boshnjakëve në veri të Mitrovicës.

Përveç zyrës së gjendjes civile në Komunën e Mitrovicës  dhe atë në Lagjen e Boshnjakëve, qytetarët e veriut, siç tha zëdhënësi Jashari,  i shfrytëzojnë për dokumente personale edhe tri zyret e tilla që funksionojnë në veri, si zyrën në Bistricë të Leposaviqit, atë në Qabër të Zubin Potokut dhe tjetrën në Kelmend të Zveçanit.

Që  nga përfundimi i luftës në Kosovë (qershor 1999), Mitrovica ka funksionuar me dy administrata. Administrata legjitime në jug dhe ajo ilegale në veriun e dominuar nga serbët. Mirëpo që nga qershori i vitit të kaluar, Institucionet në Prishtinë morën vendim për të ndaluar çdo automjet që nuk posedon targa RKS dhe KS, prandaj serbët filluan të pajisen me dokumente dhe targa të Kosovës.