Task Forca për sigurinë e trafikut rrugor

Task Forca do të bashkëpunojë me Inspektoratin e MI-së, Policinë e Kosovës dhe zyrtarë të ministrive tjera

Ministri i Infrastrukturës së Kosovës, Pal Lekaj, të premten ka nënshkruar vendimin për themelimin e njësitit të Task Forcës për sigurinë e trafikut rrugor.

Sipas kësaj Ministrie, ky njësit ka disa qëllime që i gjeni më poshtë:

1. Mbikëqyrjen dhe mirëmbajtjen e të gjitha rrugëve publike
2. Mbikëqyrjen dhe kontrollin e transportit rrugor, të udhëtarëve, mallrave dhe transportit tokësor të mallrave të rrezikshme
3. Mbikëqyrjen e sigurisë rrugore në pajtim me rregullat e trafikut rrugor
4. Kontroll i punës së Qendrave të Kontrollimit Teknik të Automjeteve

Njësiti do të udhëhiqet nga zëvendësministri i Ministrisë së Infrastrukturës Idriz Selimaj dhe përbëhet nga zyrtarë dhe ekspertë të fushave përkatëse.

Kjo Ministri ka bërë të ditur se për qëllim të efikasitetit më të madh në përmbushje të misionit, Task Forca do të bashkëpunojë me Inspektoratin e MI-së, Policinë e Kosovës dhe zyrtarë të ministrive tjera, përcjell albinfo.ch.

Këta do të përpilojnë edhe propozimet me masat konkrete të nevojshme për rritjen e sigurisë në trafik.

---