Nisin hetimet për aksidentin që la tre të vdekur në Dush të Klinës

Përgjegjësinë për rastin, zyrtarë nga TrainKosi ia bartin komunës së Klinës, e cila, sipas tyre, nuk ka vendosur sinjalizim të mjaftueshëm

Ka përfunduar me tragjedi përplasja e një veture me trenin në fshatin Dush të Klinës, duke lënë të vdekur 3 persona.

Komisioni për Hetimin e Aksidenteve dhe Incidenteve Aeronautike dhe Hekurudhore  në mbledhjen e jashtëzakonshme ka marrë vendim për hapjen e hetimeve për aksidentin . Në këtë aksident kanë humbur jetën tre persona, njëri prej tyre fëmijë i moshës 7 vjeçare. 3 personat e tjerë të aksidentuar po trajtohen në QKUK.

Familjarët e viktimave janë thellë të pikëlluar, derisa thonë se për një barrierë rruge i humbën tri anëtaret e tyre. Përgjegjësinë për rastin, zyrtarë nga TrainKosi ia bartin komunës së Klinës, e cila, sipas tyre, nuk ka vendosur sinjalizim të mjaftueshëm. Komisioni për Hetimin e Aksidenteve dhe Incidenteve Aeronautike dhe Hekurudhore thotë se do të bëjë hetim të pavarur dhe do të dalë me një raport përfundimtar të cilin sipas ligjit do t’ia përcjell Qeverisë dhe Kuvendit. E banorët e fshatit Dush të Klinës thonë se ky nuk është rasti i vetëm me fatalitet dhe se çdo ditë iu rrezikohet jeta si pasojë e rrugës së papërshtatshme.

---