Challandes: Fitorja ishte për Vokrrin

Trajneri zviceran është shprehur shumë i lumtur për fitoren e Kosovës ndaj Ishujve Faroe

Trajneri i Kosovës, Bernard Challandes, ishte shumë i lumtur pas fitores ndaj Ishujve Faroe. Ky takim u zhvillua në stadiumin e rinovuar “Fadil Vokrri” në Prishtinë.

“Fitorja është për Vokrrin që ka dhënë shumë për futbollin e Kosovës. Jam i kënaqur me këtë fitore. Ndaj Azerbajxhanit isha gjysmë i kënaqur, por tashmë jam i kënaqur. Kjo ndeshje ishte me emocione të mëdha dhe frikësohesha se si do të reagojnë lojtarët. Kishte shumë media, tifozë, familjarë e politikanë, megjithatë, lojtarët u angazhuan dhe fituam me meritë”, deklaroi trajneri zviceran në zonën ‘mix’ për gazetarë.

Ai foli edhe për dy ndeshjet e ardhshme ndaj Maltës. “Kemi kohë për të menduar për këto ndeshje. Duhet të jemi të qetë dhe jo euforik”, theksoi zvicerani.

Edhe kapiteni Samir Ujkani ishte i kënaqur me fitoren. “Fitoren ia kushtojmë Fadil Vokrri. Falënderojmë tifozët për përkrahjen që na kanë dhënë. Janë bërë pesë ndeshje që nuk kemi pranuar gol. Shpresoj se do të vazhdojmë në këtë mënyrë”, deklaroi Ujkani pas ndeshjes.

---