Veseli thotë se në PDK vendos ai vet

Kryetari i PDK-së, Kadri Veseli, pas përfundimit të takimit me disa ministra dhe anëtarë të kryesisë në PDK, tha se vendimet merren nga PDK-ja e ai si lider, por jo nga individët.

Abelard Tahiri ka vazhduar ta quajë ministër, madje si një nga më të guximshmit në kabinetin qeveritar, pa asnjë aferë korruptive.

“E takova Abelard Tahirin. Është nga ministrat që ka bërë punë shumë të guximshme dhe s’ka asnjë aferë korruptive. Vendimmarrja do të jetë e imja, e PDK-së dhe e asnjë individi”, ka thënë shkurt Veseli.

Ai ka mohuar se ka pasur mbledhje urgjente të kryesisë së PDK-së, ndërsa ka thënë se kthimi i tij nga Londra nuk ishte urgjent, por ishte paraparë që aq të zgjaste vizita atje.

Vetë Abelard Tahiri ka deklaruar se vendimi do të bëhet publik deri pasdite, e nuk ka dashur të komentojë nëse largimi i tij i mundshëm nga qeveria ndodh për shkak të vizitës që ia kishte bërë liqenit të Ujmanit krah presidentit Hashim Thaçi.

Ministri i Drejtësisë, Abelard Tahiri, nuk ka marrë pjesë në mbledhjen e sotme të qeverisë.