Edhe ministri i Mjedisit, kundër importit të veturave të vjetra

Kundërshtimeve të shoqërisë civile, opozitës dhe ndërkombëtareve për lejimin e importit të veturave më të vjetra se 10 vite që kaloi në një komision të kuvendit e në një tjetër jo i është bashkuar edhe ministri i Mjedisit dhe Planifikimit Hapësinor të Kosovës, Fatmir Matoshi.

Ai ka thënë se është kundër miratimit të amendamentit të Ligjit për Automjete, i cili përcakton vjetërsinë e importit të veturave në 15 vjet. Ministri tregon se studimet e bëra për ndotjen e ambientit tregojnë se 30 për qind e ndotjes në Kosovë e shkaktojnë veturat e vjetra, përcjell albinfo.ch.

“Unë dëshiroj që ky ligj të mos kalojë në Kuvend dhe deputetët që të mos e mbështesin këtë ligj. Mosha mesatare e veturave në Kosovë sillet rreth 20 vite të vjetra, kemi rreth 400 mijë vetura që qarkullojnë nëpër rrugët e Kosovës. Njëkohësisht ftoj edhe deputetët që edhe ata të shtojnë presionin që të kemi një kontroll më rigoroz të cilësisë së derivateve të naftës dhe po ashtu një kontroll më të rreptë në kontrollin teknik për vetura që kur regjistrohen shkojnë me kryer kontrollimin teknik, të matet saktë emetimi i gazrave që ato lëshojnë në ajër”, ka thënë Matoshi për ekonomia online. Kuvendi i Kosovës në njërën prej seancave të ardhshme pritet të vendos lidhur me ndryshimet ose jo të ligjit për Automjete.