Challandes kërkon fitore ndaj Maltës

Kosova do të jetë mysafire e Maltës, në takimin që mund të përcaktojë fatin e ‘Dardanëve’

Kosova sot është mysafire e Maltës, në takimin që zhvillohet nga ora 18:00, derisa Azerbajxhani i pret Ishujt Faroe.

‘Dardanët’ besojnë në fitore, në mënyrë që kualifikimi të vendoset në Prishtinë përballë Azerbajxhanit, shkruan albinfo.ch.

Trajneri zviceran, Bernard Challandes beson në fitore. “E filluam këtë edicion për të bërë paraqitje sa më të mira dhe jam i kënaqur me atë që kemi dhënë deri tani. Në këtë pikë po shohim se kemi shanse reale për ta mbyllur edicionin në vendin e parë të grupit, ndaj u kam kërkuar lojtarëve përqendrim, për të marrë maksimumin. E dimë se nuk do të jetë e lehtë ndaj Maltës, por ne jemi përgatitur që fillimisht të bëjmë një ndeshe të mirë dhe të shpresojmë të marrim tre pikët”, deklaroi Challandes.

Edhe futbollisti i Zurichut, Hekuran Kryeziu, shpreson në fitore. “Ne e dimë rëndësinë e këtij takimi dhe jemi përqendruar maksimalisht. Vetëm pas këtij 90-minutëshi, do të mendojmë për ndeshjen me Azerbajxhanin. Bashkë me trajnerin, e kemi studiuar me kujdes Maltën dhe e dimë që do të jetë e vështirë, por kemi ardhur këtu për të dhënë më të mirën, me shpresën për të marrë maksimumin”, është shprehur Kryeziu.

Formacioni i mundshëm i Kosovës: Ujkani; Vojvoda, Aliti, Rrahmani, Kololli; Kryeziu, Shala; Zhegrova, Berisha, Zeneli; Muriqi.

---