Në Vlorë ngrihet flamuri kombëtar

Në qytetin e Vlorës është zhvilluar ceremonia e ngritjes së flamurit kombëtar me rastin e 106-vjetorit të shpalljes së pavarësisë, ku morën pjesë presidenti Ilir Meta, kryeministri Edi Rama e kryetari i Kuvendit, Gramoz Ruçi. Drejtuesit më të lartë të shtetit shqiptar bënë homazhe dhe vendosen kurora me lule në monumentin e pavarësisë, shkruan Albinfo.ch

 Të pranishëm kanë qenë edhe qytetarë të shumtë, të cilët kanë marrë pjesë në ceremoninë në këtë ditë të rëndësishme për Shqipërinë. Presidenti i Shqipërisë, Ilir Meta, uroi shqiptarët kudo që ndodhen për 106-vjetorin e pavarësisë. Me një poezi të recituar nga dy nxënëse shqiptare të shkollës 9-vjeçare në Dacaj të Rozhajës, presidenti Meta dërgoi një urim të veçantë në këtë ditë të shënuar për të gjithë shqiptarët. Shqipëria feston sot 106-vjetorin e pavarësisë, ku më 28 nëntor 1912 Ismail Qemali ngriti flamurin në Vlorë, duke shpallur Shqipërinë shtet sovran dhe të pavarur.