Rumania mbështet Serbinë për anëtarësim në BE

Rumania thotë se do të punojë që të ndihmojë Serbinë që të anëtarësohet në Bashkimin Evropian, kur ky vend të marrë presidencën e bllokut, më 1 janar.

Kryeministrja rumune, Viorica Dancila i bëri këto komente në Beograd, pasi u takua me udhëheqësit e Serbisë, Bullgarisë dhe Greqisë, shkruan REL, përcjell Albinfo,ch.

“Rumania do të mbështesë rrugën evropiane të Serbisë. Ne të gjithë duhet të përfshihemi që të mbështesim Serbinë”, tha ajo.

Kryeministrja e Rumanisë shtoi se zgjerimi i BE-së është “prioritet” për shtetin e saj.

Të katër liderët e shteteve në takimin në Beograd diskutuan edhe për migrimin dhe temat rajonale.