Ekonomi

10 miliarderët që janë pasuruar më shumë gjatë 2018-s

Bill Gates dhe Steve Ballmer kanë fituar më shumë se 6,3 miliardë dollarë, falë performancës së mirë të aksioneve në bursë të Microsoft

E mërkurë, 26 Dhjetor 2018 - 10:30 albinfo.ch

2018-a ka qenë një vit i vështirë për shumë investitorë anembanë botës, pasi tregjet e aksioneve janë tronditur nga ngjarje si Brexit apo tensionet tregtare mes Kinës dhe Shteteve të Bashkuara të Amerikës.

Mes pasigurisë, pasuria e shumë miliarderëve është zvogëluar.

Ai që ka humbur më shumë në të gjithë botën, është CEO i Facebook, Mark Zuckerberg, për shkak të skandaleve të brendshme dhe lajmeve negative. Ai është i vetmi amerikan mes 10 miliarderëve të mëdhenj, pasuria e të cilëve është zvogëluar, gjysma e të cilëve janë nga Azia.

Megjithatë, përkundër këtij trendi, ka pasur edhe shumë miliarderë, pasuria e të cilëve është rritur. Bill Gates dhe Steve Ballmer kanë fituar më shumë se 6,3 miliardë dollarë, falë performancës së mirë të aksioneve në bursë të Microsoft, shkruan ‘monitor’.

Disa miliarderë rusë janë bërë edhe më të pasur, ndërkohë që fitimet e kompanive të tyre të naftës dhe gazit rriteshin, përcjell albinfo.ch.

Por ai që ka fituar më shumë gjatë 2018-s, me marzhin më të lartë të fitimit, është CEO i Amazon, Jeff Bezos, pasuria e të cilit është rritur me 28 miliardë dollarë, në 127,2 miliardë dollarë, mes 29 dhjetorit 2017 dhe 17 dhjetorit 2018.

Gjithsej, dhjetë miliarderët, pasuria e të cilëve është rritur më shumë, i kanë shtuar në total 64 miliardë dollarë pasurisë së tyre në 12 muajt e fundit. Rritja është shumë më e ulët krahasuar me 2017, kur vlera totale e pasurisë së dhjetë miliarderëve të parë u rrit me 204 miliardë dollarë.

10 miliarderët që janë pasuruar më shumë gjatë 2018-s