Policia zvicerane dënon shoferët që nuk i pastrojnë xhamat e veturës

Policia e Zug-ut paralajmëroi shoferët se do të dënohen dhe madje mund të humbasin licencën e tyre nëse nuk i kanë pastruar siç duhet veturat e tyre para se të dalin

Policia në kantonin e Zug-ut ka paralajmëruar shoferët se nëse nuk e pastrojnë akullin dhe borën nga veturat e tyre, atëherë do të dënohen, madje, edhe mund ta humbasin licencën e tyre, shkruan “The Local”.

Policia me anë të një komunikate ka bërë të ditur se ka dënuar disa shoferë sepse nuk e kishin pastruar akullin dhe borën në veturën e tyre, dritaret dhe pasqyrat anësore, përcjell albinfo.ch.

Në një rast, shoferi kishte hequr vetëm gjysmën e akullit në xhamin e përparmë, derisa në rastet tjera nuk kishin hequr akullin dhe borën në dritaret anësore.

Këta shoferë mund të jenë të rrezikshëm për përdoruesit e tjerë të rrugës, sidomos për këmbësorët dhe çiklistët, sepse dukshmëria e tyre është zvogëluar, përcjell tutje albinfo.ch.

Policia e Zug-ut paralajmëroi shoferët se do të dënohen dhe madje mund të humbasin licencën e tyre nëse nuk i kanë pastruar siç duhet veturat e tyre para se të dalin.

Gjithashtu edhe çatia e veturës duhet të pastrohet. Kjo parashihet edhe në bazë të ligjit zviceran, ku dritaret, xhamat, dritaret anësore dhe dritat, duhet të mbahen të pastra. Përveç kësaj, edhe targat duhet të jenë të lexueshme, përcjell albinfo.ch.

Shoferët që përbëjnë rrezik serioz për përdoruesit e tjerë të rrugës, duke mos respektuar këto, ose rregulla të tjera zvicerane të trafikut, mund të përballen edhe me një dënim me burg deri në tre vjet.

---