Vetëm 600 vetura të reja importohen në Kosovë

Markat e veturave “Volkswagen”, “Skoda”, “Ford” ishin më të kërkuara në Kosovë

Gjatë periudhës janar-korrik të këtij viti janë importuar 632 vetura të reja ndërsa niveli i importit të veturave të vjetra vazhdon të mbetet i njëjtë me vitin e kaluar. Në të njëjtën periudhë janë importuar mbi 9000 vetura të vjetra.

Kryetari i Shoqatës së Importuesve të Autorizuar të Automjeteve të Reja, Bujar Hoxha, ka bërë me dije për Epoka e Re se vlera e akcizës për veturat e reja me motor mbi 2 000 kubikë është 500 euro, ndërsa e atyre mbi 3 000 kubikë është 1 000 euro.

Hoxha ka apeluar tek institucionet që për veturat e reja të hiqet tërësisht akciza, si dhe të ketë lehtësira për makinat që janë “eko”.

Sipas Hoxhës, importi i veturave të vjetra do të duhej të ndalohej për shkaqe ekologjike.

“Rekomandoj të ndalohet importimi i makinave më të vjetra se pesë vjet, ndërsa për makinat e reja të hiqet akciza tërësisht dhe të ketë lehtësira për të gjitha veturat ‘eko’, të cilat lirojnë më pak gazra të dëmshme”, ka thënë Hoxhaj.

Ndërsa zëdhënësi i Doganës së Kosovës (DK), Adriatik Stacileci, ka bërë me dije se importi më i lartë i veturave gjatë periudhës janar-korrik të këtij viti është nga Gjermania, Franca, Japonia si dhe Shtetet e Bashkuara të Amerikës.

Stavileci ka treguar se importi i veturave të reja përgjatë kësaj periudhe është 632 copë.

Ai ka thënë se në të njëjtën periudhë të vitit 2012 sasia e veturave të importuara ishte më e lartë prej 653 sosh.

Sa i përket vlerës së akcizës për periudhën 2012, zëdhënësi Stavileci është shprehur se ajo ishte 32 000 000 euro, kurse TVSH-ja 1 682 549 64.

Sipas të dhënave doganore, vetëm brenda shtatë muajve të këtij viti, në Kosovë kanë hyrë më shumë se 9000 vetura të vjetra, që u kanë sjellë doganave rreth 19 milionë euro

Ndërkaq kryetari i Partisë së të Gjelbërve të Kosovës (PGJK), Daut Maloku, ka thënë se makinat ekologjike duhet detyrimisht të shkarkohen nga taksat ekologjike dhe të ketë stimulime të tjera për rritjen e numrit të shfrytëzuesve të këtyre makinave.

“Ky synim është plotësisht në përputhje me normat, standardet dhe strategjinë e BE-së për uljen e ndotjes nga automjetet si dhe ngritjen e cilësisë së ajrit urban dhe stimulimin e teknologjive inovative”, ka thënë Maloku.

Sipas Malokut, makinat e vjetra ndikojnë në buxhetin e shtetit dhe buxhetin familjar.

“Me rritjen e numrit të makinave, veçmas atyre të vjetra, siç është rasti me Kosovën, problemet mjedisore e shëndetësore sa vijnë e shtohen dhe me këtë ngarkohet dhe dëmtohet buxheti i shtetit dhe ai familjar, i cili shkon për shërimin e sëmundjeve të ndryshme respirative e psikike që shkaktohen s’i pasojë e cilësisë së dobët të ajrit aty ku jetojmë, punojmë apo frekuentojmë”, ka deklaruar Maloku.

---