Presidenti i Kosovës: Mosarritja e marrëveshjes rrezikon destabilizimin e rajonit

Presidenti i Kosovës, Hashim Thaçi, ka deklaruar se nëse nuk arrihet një marrëveshje këtë vit ndërmjet Kosovës e Serbisë, mund të destabilizohet rajoni.

Ai ka folur për dialogun në konferencën “Zëri i Popullit” rreth marrëveshjes mes shteteve.

“Nuk ka dyshim që nëse këtë vit nuk bëjmë marrëveshje, hyjmë në zonë të rrezikshme dhe destabilizojmë rajonin. Ne nuk mund të kemi garanci më të madhe se zotimi dhe fjalët e SHBA-së”, ka theksuar Thaçi.

Nënkryetari i LDK-së, Lutfi Haziri, ka deklaruar se partia e tij ka ofruar si opsion legjitimitetin para se të shkohet në dialog.

Kryetari i Vetëvendosjes, Albin Kurti, ka thënë se duhet të bëhet një dokument zyrtar me kërkesat e Kosovës ndaj Serbisë.

“As dëshmorët ndër varre po u ngritën, nuk kanë drejtë të falin tokën e Kosovës dhe jo më njerëzit e gjallë”, ka thënë Kurti. Bashkëdrejtuesi i Ekipit negociator të Kosovës, Fatmir Limaj, ka thënë se tërheqja e Kosovës nga tavolina e bisedimeve nuk duhet të jetë kurrë opsion.