Kosova vlerëson përkrahjen e Luksemburgut

Ministri i Jashtëm i Kosovës, Enver Hoxhaj ka shprehur mirënjohjen e popullit dhe Qeverisë së Kosovës për përkrahjen e madhe që po jep Luksemburgu për integrimin e Kosovës

Luksemburgu edhe pse është një shtete i vogël ka dhënë një kontribut të madh për zhvillimin e Kosovës, prandaj qeveria dhe populli i Kosovës i është mirënjohës këtij shteti. Kështu deklaroi ministri kosovar i Punëve të Jashtme, Enver Hoxhaj, gjatë një takimi që zhvilloi me të ngarkuarin me punë në Ambasadën e Luksemburgut në Kosovë, Pierre Weber.

Ministri Hoxhaj e ka njoftuar diplomatin Weber për proceset në Kosovë, forcimin e vazhdueshëm të shtetësisë dhe subjektivitetit ndërkombëtar. Ai ka veçuar angazhimin e fuqishëm të Qeverisë së Kosovës për përmbushjen e agjendës evropiane.

Ministri i Jashtëm i Kosovës ka shprehur mirënjohjen e popullit dhe Qeverisë së Kosovës për përkrahjen e madhe që po jep Luksemburgu, duke kërkuar mbështetje të mëtejshme për proceset eurointegruese. 　

I ngarkuari me punë në Ambasadën e Luksemburgut, Pierre Weber, ka vlerësuar progresin që po arrihet në Kosovë, duke shprehur përkrahjen e mëtutjeshme të shtetit të tij për Republikën e Kosovës.

Ministri Hoxhaj dhe Weber kanë biseduar edhe për marrëdhëniet shumë të mira bilaterale ndërmjet dy shteteve, duke shprehur vullnetin e dyanshëm për fuqizimin e bashkëpunimit dhe shkëmbimeve në shumë fusha ndërmjet Luksemburgut dhe Kosovës.